Hamd

Mai gunahgaar shewa tera der guzar
Khaliq-e-do jahan tu kahan mai kahan
Banda-e-pur khata per karam ki nazer
Malik-e-ins-o-jaan tu kahan mai kahan

Tu hai Momin,Muhaimin,Sami-o-Baseer
Tu Moeen-o-Hafeez-o-Aleem-o-Khabeer
Mai hoon mehkoom tu haakim-e- muqtadir
Mujh ko deejiye aman tu kahan mai kahan

Mai tera banda tu mera ma'bood hai
Her jaga lamha lamha tu maujood hai
Sajday kerta rahoon mai tujhey umr bhar
Tu ho wird-e-zaban tu kahan mai kahan

Tu Rahim-o-Karim-o-Qadeer-o-Latif
Mai aseer-o-faqeer-o- zaeef-o-kaseef
Aay Qavi rehm ferma meray haal per
Mai bara natawan tu kahan mai kahan

Tujh se wabasta her arzoo hai meri
Shakh-e-umeed ho jaey meri hari
Abr-e-rehmat ka is simt bhi ho guzer
Aay meray meherbaan tu kahan mai kahan

Teri dergah mai hai dua aay Riaz
Jagmaga dey meri zindagi ki biyaaz
Naqsh ker naam-e-Ahmad meray qalb per
Ho yahi hirz-e-jaan tu kahan mai kahan