Fa kaifa Kaana Nakeer…Phir dekh lo meri pakkar kaisee sakht thi

8 October,2005 ko 8.52 am per Pakistan mai zalzalay k shadeed jhatkay mehsoos kiay gaye jin ki shiddat Richter scale per 7.6 record ki gayee is k baad Pe der pe zalzalay k shadeed jhatkon ne mulk k tool-o-arz ko hila ker rakh diya…..jani aur mali nuqsaan is per mustazad hai-
Kia hum ne socha k ye sab kia hai?Ye zalzala aazmaish tha tanbeeh ya azab-e-elahi?
Ye baat sakht to hai magar na qabil-e-feham nahi.Is liay k iski khabar to mukhbar-e-saadiq Hazrat Mohammad S.A.W humein pehle hi de chuke hain.
“Jab ghanimat ko Zaati Daulat banaya janay lagay.Amanat ko Mal-e-ghanimat aur zakat ko tawan gerdana jaey.Ilm hasil kia janay lagay doosri(dunyawi) aghraz k liay. Aur log apni bewi ki ferman berdari kerein aur apni maan ki nafermani kernay lagaein.Baap ko door kerein aur doston ko qareeb kerein.Masjidon mai awazein buland hon aur qabeelay ki serdari un ka fasiq tareen shakhs keray aur qaum ka leader wo ho jo un mai sab se arzal ho.Aur jab kisi shakhs ki izzat us k sher k khof se ki jaey,peshawer ganay walian aur bajay aam hon,sharabein pee jaen aur ummat k baad walay uske aglon per lanat kerein to us waqt intezar kero----surkh andhiyoun ka , zalzalon ka aur zameen mai dhansaye janay ka aur sooratein maskh kiay janay ka aur nishanion ka jo pe der pe is terah ayein gi jis terah aik haar ho,kaat diya gaya ho us ka dhaga jis se us k danay pe der pe girnay lagein”
(Tirmizi)
Danay per danay gir rahey hain.Tsunami, Katrina, Rita aur ab ye shadeed zalzala.Iske mabain dunniya bhar mai choti bari afaat.
Wo jinhein dunniya bhar mai Islam aur Iman ki roshni phailanay per mamoor kia gaya tha khud arzal aur asfal ho gaye.Maqsid-e-zindagi (amr bil maroof wa nahi anil munkir) se moon mor ker hadith mai mazkoor derj-e-bala tamam amoor mai taaq ho gaye .Na sirf hum khair-o-sher ki tameez bhula baithay balke hum shur k medan mai saray lunger langot kas ker muqabala baazi per utar aye.Khawa wo nachnay ganay ya thiraknay k muqabalay hon.Dress shows hon ya Hazrat Fatima R.A aur Hazrat Aisha R.A ki waris khail kay medanon mai saari hadein phalang janay k muqabalay jeet rahi hon.Saray mulk mai cable,videos aur net uryani aur fahashi aam kernay mai din raat aik kiay de rahey hon.Jihad fasad qarar paey.Kufr k shana bashana humrai pak ser zameen apnay hi musalmaan bhayoun k shikar mai mehav ho.Musalmaan aurtein ,bachay humaray hi hathon der badar hon.Kufr k saath Front line state, Allah k ghazab mai bhi front line mai hi pakri jaey gi.
Be gunah muslamanon ka khoon, in per qaid mai toray janay walay be panah mazalim…Muzloom ki bad-dua bila rok tok rub tak pohanchti hai.Yateem bachon,bewa aurton,lawaris musalmaan betion (jinhein is haal mai hum ne pohanchaya hai)ki aah per qaher na tootay to aur kia ho ga.Musalmaan bhayoun ka shikar kertay kertay hum khud Allah k ghazab ka shikar ho gaye.Wajah Nabi S.a.w. hadees-e-qudsi mai bayan ferma gaye. “ Jis ne meray dost se dushmani ki.Mai ne us k khilaf ailan-e-jang kia.”
Allah k ghazab se zameen tharra uthi.Pahar laraz uthay.Today gir paray .Zameen shuq ho gayee.Chashm-e-zadan mai luxury five star tower zameen bos ho gaya.Bastion ki bastian fana k ghat uter gayeen.
“Kia tum is se be khof ho k wo jo aasman mai hai tumhein zameen mai dhansa dey aur yaka yuk ye zameen jhakolay khanay lagay ?Kia tum is se be khof ho k wo jo aasman mai hai tum per pathrao kernay wali hawa bhaij dey .Phir tumhein maloom ho jaey ga k meri tanbeeh kaisee hoti hai.
(Sorah-e-Al-Mulk:16,17)
Hum moon dekhtay reh gaye…………
Qallal insaana ma laha.."insaan kahey ga k issay(zameen) kia ho gaya hai?"
Ab madad k liay kis ko pukarein.America ko?UN ko?dehshat gerdi k khilaf itehadi doston ko? Ya Allah ko?
“Agar Allah tumhein kisi qisam ka nuqsaan pohanchaye to us k siwa koi nahi jo tumhein is nuqsaan se bacha sakay.”
(Sorah-e-Al Inaam :17)
Is larazti zameen ko kaun thamay ga?Sajdon k siwa is larazti zameen ka koi madawa nahi.Is aik sajday mai in hazar sajdon se nijat muzmir hai jo detay detay hum Allah k ghazab ka luqma ban gaye.
America per Katrina aur Rita ka qaher toota aur hum per zalzalay ka kora aa bersa.
Aik thelay k chattay buttay banein gay to nataij bhi yuksaan beraamad hon gay.
Musalmanon k khoon se rangay hathon se dosti .In k rang mai humara rangay jana.
Jab k Allah ne humein apnay rang mai rangnay k liay Quran nazil fermaya tha
“Allah ka rang Aur Allah k rang se behter kaunsa rang ho ga?”
(Al-Baqara)
Allah ne goya rang kaat daal ker humaray jhootay aur ghalat rang dho dalnay aur chura denay chahay hain.
Laut ayee apnay asal rang ki teraf ….. aur Allah se raju kejye
“ Aay mominon tum sab mil ker Allah se tauba kero.Tawaqa hai k falah pao gay”
(Al-Noor :31)
Allah yaqeen dihani kerwata hai
“Aay meray bando jo apni janon per zulm ker baithay ho Allah ki rehmat se mayoos na ho jana. Allah tumharay saray k saray gunah maaf ker dey ga”
(Al-zumr)
Ye mahina hai rehmat,maghfirat aur nar-e-jahannum se nijat ka.Jis terah maan naraz ho ker aulad ko thappar bhi marti hai to is se us ki terbiat hi matloob hoti hai.Isi terah Allah humein hadayat per lautana chahta hai.Aayee laut chalein apnay rub ki raza aur tauba-tu-nasooh ki teraf…….Sachi khalis haqeeqi tauba ki teraf. Sirf nok-e- zaban se ashtaghfar nahi.Amal se saboot panay wali tauba……………Hum Allah ko raazi ker lein gay.Inshallah.is liay k uska wada hai:
“ Agar tum un baray baray gunahon se perhaiz kertay raho Jin se tumhein mana kia ja raha hai to hum tumhari choti choti burayoun ko mita dein gay aur tumhein izzat ki jagah dakhil kerein gay”
(An-nisa:31)
Humrai khata ye hai k hum ne gunahon ki pehchan ganwa di.Baray baray gunahon k azdahay humari janon ko liptay huwe hain aur humein un ka ehsaas,idraak hi nahi.Wo tamam hukam jo Allah ne Quran mai diye unhein torna gunah-e-kabeera hai.
Allah ko raazi kernay ,sachi tauba kernay k liay humein sab se pehley Faraiz per istiqamat ikhtiar kernay ka Allah se wada kerna ho ga .Faraiz chor ker nawafil se Rab ko raazi nahi kia ja sakta..Lehaza hum aur humaray bachay kia kerein?
Namaz:Paanch waqt ki namaz ki pabandi.her jagah her haal mai.Merd ki namaz ka maqam masjid hai.
Roza:Beghair shar’aee uzr k roza chornay ka tassawur na ho.Roza faqay ki soorat na ho.Tamam aa’za ko Allah ki nafermani se bachanay aur fermanberdaari ki adat,terbiat k liay ho.
Zakat:Allah k ata kerda maal mai se hisab ker k poori poori salana zakat ki adayegi.Jis Terah gin gin ker ,hisab ker k sameta jata hai.Kam az kam Allah ki raah mai hisab ker k ye ferz ada kernay ka tehayya kia jaey.
Hajj:Istita’at rakhnay k bawajoob ghair sharayee uzr(betion k jahez/plots mai dafan paisa) k tehat ferz ko moakhar kerna Allah k ghazab ko pukarna hai.
Perda:Is ziman mai ye ghalat fehmi k ye ikhtiari fael hai .Ye ki bareek dupatta ser per saja ker perda ho jata hai kuliyatan ghalat hai.Qur’an se wazih ehkaam perhiye.Mukammal aur durust perda kejiye.Ye Allah ki sipah ki zanana werdi hai jo adhoori nahi pehni ja sakti aur na hi utari ja sakti hai.Bhalay America is werdi per aiteraz kerta hai.
Behayaee/Fahashi:Jiski tareef mutayyan kerna bhi aaj kal mumkin nahi raha.Moaashra kisi fael,kisi libas ,kisi chalan, kisi terz-e-amal ko fahashi nahi gerdaanta.
Quran-o-sunnat ko rehnuma bana ker T.V.,Cable,Net,akhbarat aur rasael ko nukail dali jaey.Aurat ,aurat aur bas aurat.Ishtehar mai aurat .billboard per aurat.Chahar janib aurat arzan aur uryaan ker di gayee hai.
Hazrat Fatima,Khadija aur Aisha R.A. k terz-e-amal ka namoona humaray samnay saja denay k baad ye sab Allah k ghazab ko pukarnay ka moajib hai.Aurat ko Haya aur Hijab lautayee.Uska ka taqadus aur waqar bahal kejiye.Wo jinse bazaar (commodity) nahi hai.Aurat khud apnay wajood ko ehtram aur taqadus ki chader mai samait lay to shayed larazti zameen bhi tham jaey.
Rizq-e-Halal:Jiski pabandi k beghair koi ibadat maqbool nahi.Haram rizq kama ker Allah se rishta munqata ho jata hai.
Kuffar se dosti:Kufr se dosti k natay chor ker ,tor ker Ummat se rishta bahal ker liay jaey.Phalastine,Afghanistan,Iraq,Kashmir ka gham humara gham hai.Hum is gham se dastberdaar ho ker in ser zameenon per zulm-o-jabr k pahar tornay walon se mohabbat nahi ker saktay .Dosti ki peengein nahi berha saktay.
Aayee Pakistan ko islam ka Qila banayein.Takay anay walay kal mai is ser zameen se Imam Mehdi k lashker tayyar hon.Dajjal k lashkaron ko nafri faraham kerna humara pesha na banay.
Allah tala hum per apni rehmat wasee keray.Allah ki rehmat ko pukariye,Sachi tauba k saath.Kyun k Gunah se sachi tauba kernay wala aisa hai goya usne gunnah kia hi nahi.
“Tum se pehley bohat si qaumon ki teraf hum ne rasool bhaijay .Aur un qaumon ko masaib aur alaam mai mubtala kia takay wo aajzi k saath humaray saamnay jhuk jaein.Pas jab humari teraf se un per sakhti ayee to kyun na unhon ne aajzi ikhtiar ki?Magar un k dil to aur sakht ho gaye aur shayateen ne un ko itminan dilaya k jo kuch tum ker rahey ho khoob ker rahey ho.”
(Al-Inam:42,43)
Huzoor S.A.W ne fermaya:
“TUM AMAL K LIAY INTEZAAR KERTAY HO---------------------
Us khush haali aur dolat mandi ka jo aadmi ko serkash ker deti hai
Ya intezaar kertay ho us nadari aur mohtaji ka jo sab kuch bhula deti hai
Ya intezaar kertay ho halat bigar denay wali beemari ka
Ya aql-o-hawas kho denay walay burhapay ka
Ya achanak anay wali aur fana ker denay wali maut ka
Ya tum muntazir ho Dajjal k,Aur dajjal badtareen ghaib hai jiska intezaar kia jaey
Ya tum muntazir ho qayamat k ,aur qayamat bara sakht hadisa aur bara kerwa ghoont hai.”
(Tirmizi,Nisayee)
KIA AMAL MOAKHAR KERNAY AUR INTEZAR KI GUNJAISH HAI?